پاکستان کی جیت: ’حسنین کو حارث رؤف کا شکریہ ادا کرنا چاہیے‘

پاکستان نے چوتھے ٹی20 میچ میں انگلینڈ کو سنسنی خیز مقابلے کے بعد تین رنز سے ہرا کر سات میچوں کی سیریز 2-2 سے برابر کردی ہے۔

اتوار کو کراچی کے نیشنل سٹیڈیم میں کھیلے جانے والے میچ میں پاکستان نے پہلے بیٹنگ کرتے ہوئے انگلینڈ کو 167 رنز کا ہدف دیا۔

اس ہدف کے تعاقب میں انگلینڈ کی ٹیم صرف 163 رنز بناسکی۔ پاکستان کی طرف سے حارث رؤف اور محمد نواز نے تین، تین اور محمد حسنین نے دو وکٹیں لیں۔

یہ میچ اتنا سنسنی خیز رہا کہ دیکھنے والے دل تھامے بیٹھے رہے اور جب محمد حسنین نے اٹھارویں اورر میں 24 رنز دیے تو ایسا لگ رہا تھا جیسے اب انگلینڈ میچ جیت جائے گا لیکن اگلے اوور میں حارث رؤف نے دو گیندوں پر دو وکٹیں لے کر پاکستان کی جیت کو یقینی بنادیا۔

سوشل میڈیا صارفین بھی میچ کے آخری مراحل میں پریشان نظر آئے لیکن پاکستان کے میچ جیتنے کے بعد ان کی خوشی دیدنی تھی۔

حارث رؤف کو شاندار کارکردگی پر مین آف دا میچ کو دیا گیا اور سوشل میڈیا پر بھی وہی ہر طرف چھائے ہوئے نظر آئے۔

شاہزیب خانزادہ نے ایک ٹویٹ میں لکھا ’حارث رؤف ہیرو ہے۔‘

کچھ صارفین تو فاسٹ بولر سے اتنے متاثر ہوئے کہ ان کی شان میں شاعری کرنے لگے۔

پاکستان کے ایک اور فاسٹ بولر محمد حسنین بھی سوشل میڈیا پر موضوع بحث رہے۔ انہوں نے اپنے چوتھے اوور میں 24 رنز دیے لیکن اس سے قبل تین اوررز میں انہوں نے 16 رنز دے کر دو وکٹیں حاصل کی تھیں۔

ساج صادق نے ان کی تعریف کرتے ہوئے لکھا کہ ’محمد حسنین دکھا رہے ہیں کہ یارکرز آج بھی کرکٹ کے ہر فارمیٹ میں بہترین ہتھیار ہیں۔‘

حجاب زاہد نے لکھا کہ حسنین نے انگلینڈ کے خلاف اٹھارویں اوورز میں اچھی بولنگ نہیں کی لیکن اس بات پر سب کا اتفاق ہے کہ انہوں نے پاور پلے میں اچھی بولنگ کی۔

عامر مالک نے لکھا کہ محمد حسنین سے ٹیم منیجمنٹ کو بات کرنی چاہیے اور بتانا چاہیے کہ ٹی20 فارمیٹ میں کوئی بھی برا اوور ہوسکتا ہے اور انہیں گھبرانا نہیں چاہیے۔

یہ بات تقریباً سب کو ہی معلوم ہے کہ اگر پاکستان میچ ہارتا تو شاید محمد حسنین کے خراب اوور کو اس کا ذمہ دار قرار دیا جاتا۔

اس حوالے سے ایک ٹویٹ میں عمر قریشی نے لکھا ’حسنین کو حارث رؤف کا شکریہ ادا کرنا چاہیے۔‘