’رانا جی معاف کرنا،‘ سوشل میڈیا پر ہر طرف فہیم اشرف کے چرچے

پاکستان سپر لیگ (پی ایس ایل) کے 24 ویں میچ میں منگل کی رات اسلام آباد یونائیٹڈ نے ملتان سلطانز کو ایک سنسنی خیر مقابلے کے بعد دو وکٹوں سے شکست دی۔

راولپنڈی میں کھیلے گئے میچ میں دونوں ٹیموں کے کئی بیٹرز نے برق رفتار اننگز کھیلیں لیکن اسلام آباد یونائیٹڈ کو جتوانے میں آل راؤنڈر فہیم اشرف نے نمایاں کردار ادا کیا۔

ملتان سلطانز نے پہلے بیٹنگ کرتے ہوئے اسلام آباد یونائیٹڈ کو پہاڑ جیسا 206 رنز کا ہدف دیا جس میں شان مسعود کے 50 گیندوں پر 75 اور ٹم ڈیوڈ کے 27 گیندوں پر 60 رنز بھی شامل تھے۔

اس ہدف کے تعاقب میں کولن منرو نے 21 گیندوں پر 40 اور اسلام آباد یونائیٹڈ کے کپتان شاداب خان نے 25 گیندوں پر 44 رنز بنائے لیکن یہ میچ پھر بھی اسلام آباد کی پہنچ سے دور تھا۔

لیکن فہیم اشرف کی 26 گیندوں پر 51 رنز کی ناقابل شکست اننگز نے اسلام آباد یونائیٹڈ کی ٹیم کو میچ کے آخری اوور میں یہ میچ جتوا دیا۔

میچ کے آخری اوور میں اسلام آباد یونائیٹڈ کو 6 گیندوں پر 18 رنز درکار تھے اور ملتان سلطانز کی جانب سے آخری اوور محمد الیاس کو دیا گیا تھا۔ فہیم اشرف نے اس اوور میں ایک چھکا اور دو چوکے لگا کر اپنی ٹیم کو یہ میچ جتوا دیا۔

سوشل میڈیا صارفین فہیم اشرف کی جارحانہ بیٹنگ پر ان کو داد و تحسین دیتے ہوئے نظر آ رہے ہیں۔

مرزا زید نے ایک ٹویٹ میں لکھا کہ ’جب فہیم اشرف تیراکی کے لیے جاتے ہیں تو پانی سیفٹی جیکٹ پہن لیتا ہے۔‘

کرکٹ پر رپورٹنگ کرنے والے صحافی مظہر ارشد نے ایک مزاحیہ ٹویٹ میں لکھا کہ ’جب فہیم اشرف پیدا ہوئے تو انہوں نے نہ رونے پر ڈاکٹر کو تھپڑ مارا تھا۔‘

آخری اوور میں فہیم اشرف کے بلے سے لگنے والا چھکا بھی صارفین کی توجہ کا مرکز ہے اور وہ اسے ٹورنامنٹ کا سب سے بہترین شاٹ قرار دے رہے ہیں۔

فرید خان نے آخری اوور کی ویڈیو شیئر کرتے ہوئے لکھا ’مجھ کو رانا جی معاف کرنا غلطی مارے سے ہو گئی۔‘

انڈین سپورٹس جرنلسٹ ہمانشو پاریکھ نے لکھا کہ ’فہیم اشرف سے پہلے پی ایس ایل میں کوئی بھی ٹیم کسی ہدف کے تعاقب میں آخری اوور میں 18 رنز نہیں بنا سکی تھی۔‘

انہوں نے اسے ایک ریکارڈ قرار دیتے ہوئے کہا کہ فہیم اشرف نے انگلینڈ کے کھلاڑی بین سٹوکس یا انڈیا کے سابق کپتان مہیندر سنگھ دوھونی والا کام کیا ہے۔

اسلام آباد یونائیٹڈ ملتان سلطانز کے خلاف میچ جیتنے کے بعد پوائنٹس ٹیبل پر 12 پوائنٹس کے ساتھ دوسرے نمبر پر آ گئی ہے اور پی ایس ایل کے آٹھویں ایڈیشن کے پلے آف مرحلے تک کوالیفائی کر گئی ہے۔