پیٹرول کی قیمت: ’نیند پوری کرنے دی شکریہ میاں صاحب!‘

حکومت کی جانب  سے پیٹرول کی قیمتوں میں تقریباً 20 روپے فی لیٹر کا اضافہ عوام کے لیے بڑا جھٹکا ثابت ہوا ہے اور وہ سوشل میڈیا پر سخت ردعمل کا اظہار کر رہے ہیں۔

منگل کے روز پاکستان کے وزیر خزانہ اسحاق ڈار نے اپنے مختصر ویڈیو پیغام میں پیٹرول کی قیمتوں کو بڑھانے کا اعلان کیا۔

پیٹرول کی فی لیٹر قیمت 19.95 روپے بڑھنے کے بعد 272.95 روپے جبکہ ڈیزل کی قیمت 19.90 روپے بڑھنے کے بعد 273.40  روپے ہو گئی ہے۔

سوشل میڈیا پر پیٹرولیم مصنوعات کی قیمتوں میں اضافے پر جہاں صارفین مہنگائی کا رونا روتے نظر آئے وہیں اس فیصلے کے ممکنہ معاشی اور سیاسی اثرات بھی موضوعِ بحث ہیں۔

ڈاکٹر منصور کلاسرا نے اپنی ٹویٹ میں لکھا کہ ’حکومت کو بولیں روز روز بجلی پیٹرول ڈیزل کی قیمتیں بڑھا کر ہمیں سسک سسک کر مارنے کے بجائے ایک ہی دفعہ زہر کے ٹیکے لگا دیں۔‘

خیبرپختونخوا کی صوبائی اسبملی کے رُکن اختیار ولی نے لکھا کہ ’حکومت کی آئی ایم ایف کے ہاتھوں مجبوری اپنی جگہ لیکن مہنگے پیٹرول کو سستا نہیں کہہ سکتے۔‘

ٹوئٹر صارف صائقہ خان نے لکھا کہ ’حکومت چاہتی تو کل رات کو قیمتیں بڑھا سکتی تھی لیکن بڑے میاں صاحب کو عوام کی بہت فکر تھی، انہوں نے کہا کہ اگر رات کو اعلان کیا تولوگ سوئیں گے کیسے؟ پھر فیصلہ کیا گیا جب صبح چار بجے سونے والے بھی نیند پوری کر کے جاگ جائیں تو اعلان کیا جائے، اس احساس کا شکریہ میاں صاحب!‘

اظہر محمد خان نامی صارف نے طنز کیا کہ ’اگر حکومت چاہتی تو پیٹرول کی قیمت میں 20 روپے کا اضافہ بھی کر سکتی تھی مگر صرف غریبوں کے احساس کی وجہ سے سے ایسا نہیں کیا۔ حکومت کا شکریہ تو بنتا ہے۔‘

آمنہ زبیر نامی ٹوئٹر صارف نے سائیکل پر بیٹھنے کی تصویر شیئر کرتے ہوئے لکھا ’کہا تھا سب کو کہ سائیکل چلانا سیکھ لیں پرنہیں۔ پیٹرول کی قیمتوں میں 20  روپے اضافہ۔ گُڈ گورننس کے دور میں آپ کو خوش آمدید کہتے ہیں۔‘

ایک اور صارف آر اے شہزاد نے اپنی ٹویٹ میں لکھا کہ ’پیٹرول کی قیمت میں 19.95 روپے اضافہ، ڈیزل کی قیمت میں 19.90 روپے اضافہ، حکومت ختم ہونے میں ہفتہ رہ گیا ہے اور آپ الیکشن میں جانے کی تیاری چیک کیجیے۔‘

بروکن نیوز نامی پیروڈی اکاؤںٹ نے پاکستان مسلم لیگ ن کی چیف آرگنائزر مریم نواز شریف سے فرضی بیان منسوب کرتے ہوئے لکھا کہ ’صرف سٹاک ایکسچینج اوپر لے جانے والی حکومت ہماری ہے، پیٹرول مہنگا کرنے والی حکومت ہماری نہیں ہے۔‘