کنگ سلمان کلب کپ فائنل: رونالڈو نے تاریخ رقم کر دی، النصر کی الہلال کے خلاف فتح

کنگ سلمان کلب کپ کے فائنل میچ میں سعودی کلب النصر نے کرسٹیانو رونالڈو کی قیادت میں الہلال کو شکست دیتے ہوئےعرب کلب چیمپیئنز کپ کا ٹائٹل اپنے نام کر لیا ہے۔

خبر رساں ادارے روئٹرز کے مطابق فٹبال سٹار کرسٹیانو رنالڈو کے النصر کلب نے سعودی ٹیم الہلال کو 2-1 سے شکست دی ہے۔ 

النصر کلب پہلی مرتبہ عرب کلب چیمپیئنز کپ کا ٹائٹل اپنے نام کرنے میں کامیاب ہوا ہے۔

کنگ سلمان کلب کپ کے تحت ہونے والے مقابلے میں خطے کے بہترین عرب کلبز نے شرکت کی جس میں سعودی عرب، قطر، متحدہ عرب امارات، عراق، مراکش، تیونس اور الجیریا سے ٹیمیں شامل تھیں۔

فائنل میچ کے پہلے حصے میں النصر ٹیم میں شامل فٹبال سٹارز ساڈیو مانے، سیکو فوفانا اور مارسیلو بروزووچ کو گول کرنے کے بہترین موقعے ملے لیکن حریف ٹیم کے گول کیپر محمد الاویس نے بہترین کارکردگی دکھاتے ہوئے ناکام بنا دیے۔

کنگ فہد سپورٹس سٹی میں ہونے والے میچ کے دوسرے حصے کے پہلے چھ منٹ تک کسی ٹیم کو سکور کرنے کا موقع نہیں ملا لیکن الہلال کے میلکوم نے گیند کو کراس کیا اور ان کے ساتھ مائیکل نے فری ہیڈ کے ذریعے گول کر کے اپنی ٹیم کو برتری دلا دی تاہم زیادہ دیر تک قائم نہ رکھ سکے۔

رونالڈو نے الہلال کی برتری جلد ہی ختم کرتے ہوئے میچ کے 74 ویں منٹ میں گول کا جواب گول سے دیا۔

دونوں ٹیموں کے گول برابر ہونے پر اضافی وقت دیا گیا جس کا فائدہ اٹھاتے ہوئے رونالڈو نے 98 ویں منٹ میں ایک اور گول کر کے چیمپیئن ٹرافی النصر کے نام کروا دی۔

النصر کلب کے لیے دونوں گول کرسٹیانو رونالڈو نے کیے اور فٹبال سٹار ہی ٹورنامنٹ میں سب سے زیادہ 6 گول کر کے ٹاپ سکورر رہے۔