کویت کی آئل ریفائنری میں لگی آگ پر قابو پا لیا گیا

کویت کی نیشنل پٹرولیم کمپنی نے کہا ہے کہ ’مینا الاحمدی ریفائنری کے ایک یونٹ میں لگنے والی آگ پر قابو پالیا گیا‘۔

کمپنی کے ترجمان غانم العتیبی نے بتایا کہ’ ریفائنری میں آگ لگنے سے پیداوار اور برآمدی کام متاثر نہیں ہوا۔ ریفائنری میں معمول کے مطابق کام جاری ہے‘۔

بیان میں کہا گیا کہ’ آگ جمعے کو لگی ۔ کوئی جانی نقصان نہیں ہوا‘۔

یاد رہے کہ رواں برس 28 جولائی کو بھی مینا الاحمدی ریفائنری کے پروڈکشن یونٹ کی ایک لائن میں لگی تھی

مینا الاحمدی آئل ریفائنری دارالحکومت کے جنوب میں واقع ہے۔ ریفائنری 10.5 مربع کلو میٹر کے رقبے میں پھیلی ہوئی ہے۔

1949 میں قائم ہوئی تھی۔ یہ کویت کی تین قومی آئل ریفائنریوں میں سے ایک ہے اور یہ سب سے بڑی ہے۔ اس سے روزانہ 4 لاکھ 66 ہزار بیرل خام پیٹرول صاف کیا جاتا ہے۔ 

جنوری 2022 کے دوران اس کے ایک یونٹ میں آگ لگ گئی تھی جس سے دو افراد ہلاک اور دو زخمی ہوگئے تھے۔ 

کویت جو خلیج کے تیل کی دولت سے مالا مال ملکوں میں سے ایک ہے روزانہ 2.7 ملین بیرل تیل برآمد کرتا ہے۔ 

کویت کی نوے فیصد آمدنی پیٹرول پر منحصر ہے یہ تیل برآمد کرنے والے ممالک کی تنظیم اوپیک کا کلیدی ممبر ہے۔