پیرس اولمپکس: آسٹریلوی ہاکی پلیئر مبینہ طور پر کوکین خریدنے کے الزام میں گرفتار
آسٹریلین اولمپکس کمیٹی نے بھی اس بات کی تصدیق کی ہے کہ آسٹریلوی ہاکی ٹیم کے رکن کو گرفتار کیا گیا ہے۔ (فوٹو: اے ایف پی)
فرانس کے دارالحکومت پیرس میں جاری اولمپکس کے عالمی مقابلوں کے حوالے سے ایک بڑی خبر سامنے آئی ہے کہ آسٹریلیا کی ہاکی ٹیم کے ایک کھلاڑی کو مبینہ طور پر کوکین خریدنے کے الزام میں گرفتار کر لیا گیا ہے۔
اے بی سی نیوز کے مطابق ایک آسٹریلوی ہاکی پلیئر پیرس میں مبینہ طور پر کوکین خریدنے کے الزام میں فرانس کی تحویل میں ہے۔
پیرس پبلک پراسیکیوٹر نے اس بات کی تصدیق کی کہ 28 برس کے آسٹریلوی کو منگل کی شام کو اس وقت گرفتار کیا گیا جب پولیس نے اسے قابل اعتراض مواد خریدتے ہوئے پایا۔
آسٹریلوی ہاکی پلیئر پر ابھی تک کوئی دفعہ نہیں لگائی گئی۔
دوسری جانب آسٹریلین اولمپکس کمیٹی (اے او سی) نے بھی اس بات کی تصدیق کی ہے کہ آسٹریلوی ہاکی ٹیم کے رکن کو گرفتار کیا گیا ہے۔
اے او سی نے اپنے بیان میں کہا کہ ’آسٹریلین اولمپک کمیٹی اس بات کی تصدیق کرتی ہے کہ 6 اگست کو گرفتار ہونے کے بعد آسٹریلوی ہاکی ٹیم کا کھلاڑی تحویل میں ہے۔ ابھی تک کھلاڑی پر کوئی دفعہ نہیں لگائی گئی۔‘
انہوں نے مزید کہا کہ ’اے او سی کی جانب سے لگاتار پوچھ گچھ جاری ہے اور ٹیم کے رکن کے لیے مدد تیار کی جا رہی ہے۔‘
پیرس کے پراسیکیوٹر آفس کا کہنا ہے کہ آسٹریلوی کھلاڑی کو اس وقت گرفتار کیا گیا جب انہیں پولیس اہلکاروں نے کوکین خریدتے ہوئے دیکھا۔
خیال رہے کہ ابھی تک اس بات کی تصدیق نہیں ہو سکی کہ گرفتاری آسٹریلیا کی خواتین ہاکی ٹیم کی رکن کی ہوئی ہے یا مردوں کی ہاکی ٹیم کے کھلاڑی کو گرفتار کیا گیا ہے۔
