عید الاضحی پر 515 قیدیوں کی رہائی کا حکم
جمعہ 24 جولائی 2020 17:57
متحدہ عرب امارات کےصدر شیخ خلیفہ بن زاید آل نہیان نےعید الاضحی پر 515 قیدیوں کو رہا کرنے کا حکم دیا ہے۔
صدارتی حکم سے رہائی پانے والے یہ قیدی مختلف جرائم میں سزائیں پوری کر رہے تھے۔ شیخ خلیفہ بن زاید نے ان قیدیوں کے ذمے جرمانوں کو بھی ادا کرنے کا حکم دیا ہے۔
یو اے ای کی نیوز ایجنسی (وام) کے مطابق صدارتی معافی متحدہ عرب امارات کے انسانی ہمدردی کی بنیاد پر کیے جانے والے ان اقدامات کا حصہ ہے جو کہ رواداری اور عفو درگزر کی اقدار پر مبنی ہیں۔
رہائی پانے والے قیدیوں کو زندگی کو نئے سرے سے بہتر انداز میں گزارنے کا موقع فراہم کیا جاتا ہے تاکہ وہ مثبت کردار ادا کرکے اپنے اہل خانہ اور معاشرے کے لیے مفید صابت ہوں۔
قیدیوں کی سزا میں یہ معافی شیخ خلیفہ بن زاید کے اس عزم کا حصہ ہے جو خاندانی ہم آہنگی ، فیملیز کو مسرت دینے اور معافی پانے والے قیدیوں کو ایک بہتر مستقبل کی تعمیر کا موقع میسر کرنے کے لیے ہے۔
یاد رہے کہ متحدہ عرب امارات کے صدر شیخ خلیفہ بن زاید آل نہیان نے رمضان کی آمد پر 1511 قیدیوں کی رہائی کا حکم جاری کیا تھا-
