پاکستان کے ساتھ تعلقات اہم ہیں: امارات

پاکستان میں متحدہ عرب امارت کے سفیر حمد ازعابی نے پارلیمنٹ ہاؤس اسلام آباد میں سینیٹ کے چیئرمین محمد صادق سنجرانی سے ملاقات کی۔

ملاقات میں دوطرفہ تعاون، پارلیمانی رابطوں میں تیزی لانے سمیت اقتصادی شعبوں میں رابطے بڑھانے پر زور دیا گیا۔

سینیٹ سیکرٹریٹ سے جاری ہونے والے اعلامیے کے مطابق اماراتی سفیر سے گفتگو کرتے ہوئے چیئرمین سینیٹ نے کہا کہ  پاکستان اور متحدہ عرب امارات کے درمیان تعلقات کی بنیاد مشترکہ روایات، مذہبی اقدار اور سماجی مماثلتوں پر ہے۔

چیئرمین سینیٹ نے دونوں ملکوں کے درمیان اقتصادی ترقی کے لیے رابطوں کے فروغ کی ضرورت پر زور دیا اور کہا کہ پارلیمانی سطح پر وفود کے تبادلوں اور پاکستان میں سرمایہ کاری کے مواقعوں سے فائدہ اٹھانے کے لیے باہمی تعاون اور رابطوں کو مزید بڑھانے کی ضرورت ہے۔

انھوں نے کہا کہ متحدہ عرب امارات پاکستان میں تجارتی اور اقتصادی شعبوں میں سرمایہ کاری کے مواقعوں سے فائدہ اٹھا سکتا ہے۔

ملاقات میں بین الپارلیمانی یونین کے نومبر میں ہونے والے صدارتی انتخابات پر بھی تبادلہ خیال کیا گیا۔ بین الپارلیمانی یونین کے صدارتی انتخابات میں حصہ لینے پر چیئرمین سینیٹ نے متحدہ عرب امارات سے حمایت حاصل کرنے کے لیے اس کی قیادت سے رابطہ کرنے کا فیصلہ بھی کیا۔

چیئرمین سینیٹ نے کہا کہ آئی پی یو، ایشیائی پارلیمانی اسمبلی اور دیگر اہم فورمز پر مثالی تعاون پایا جاتا ہے۔ دوطرفہ تعاون کو مزید وسعت دینے کے خواہاں ہیں۔ اعلیٰ سطح پر وفود کے تبادلوں میں تیزی لانا ہوگی۔

انھوں نے کہا کہ متحدہ عرب امارات میں مقیم پاکستانی کمیونٹی کا کورونا وبا کے دوران خیال رکھنے پر حکومت اور عوام کا شکریہ ادا کرتے ہیں۔

اس موقع پر اماراتی سفیر نے پاکستانی حکومت کی جانب سے کورونا وبا پر قابو پانے کے لیے کیے گئے اقدامات کو سراہا اور کہا کہ لاک ڈاؤن کے باعث مشکلات پیدا آئیں لیکن حکومتی اقدامات قابل تحسین ہیں۔

انھوں نے کہا کہ وہ پاکستان کے ساتھ دوطرفہ تعلقات کو انتہائی اہم سمجھتے ہیں۔ تجارتی تعاون میں اضافے کے لیے مشترکہ کوششیں کرنے کی ضرورت ہے۔