’پائین یوٹیوب چلاؤ، منڈیاں نوں کرکٹ کھیڈن دیو‘

پاکستان کرکٹ ٹیم کے سابق فاسٹ بولر شعیب اختر کا یوٹیوب چینل پچھلے کچھ عرصے کے دوران خاصا مشہور ہوا ہے۔ کھلاڑیوں کو کرکٹ کے گُر بتاتے بتاتے اکثر وہ غصے میں بھی آ جایا کرتے اور سخت باتوں کے علاوہ ہلکا پھلکا مذاق بھی کر لیا کرتے، جس کی وجہ سے ان کی ویڈیوز دیکھنے والوں کی تعداد لاکھوں میں چلی جاتی تاہم آج ان کا ایک ایسا کلپ ٹوئٹر پر شیئر ہوا ہے جس میں وہ دلیری اور پھینٹا جیسے الفاظ کا استعمال کرتے ہوئے بات چیت کر رہے ہیں۔ جس پر بعض صارفین کی جانب سے تبصرہ ہوا کہ یہ ہمارے بہترین کرکٹر ہیں جو کھیل میں بدمعاشی کو فروغ دے رہے ہیں۔

اس کلپ میں شعیب اختر دیکھنے والوں سے مخاطب ہیں اور کہتے ہیں کہ ’آپ کو یاد ہے وہ زمانہ جب فاسٹ بولر آتے تھے، جاتے تھے پتہ لگتا تھا، کوئی تھپہ شپہ پڑتا تھا بدمعاشی ہوتی تھی۔ اب کرکٹ سے بدمعاشی ہی آؤٹ ہے، آپ نے انڈیا اور پاکستان کا میچ دیکھا ہوگا۔ کیا بکواس کرکٹ ہے، نہ کوئی لمبے بال، نہ مونچھیں نہ شرٹ کھلی ہوئی یہ وکٹ ہمیں دیتے تو دو تین بندے تو زخمی ہوتے‘

ٹوئٹر پر زیر گردش اس ویڈیو پر سوشل میڈیا صارفین پنڈی ایکسپریس کو تنقید کا نشانہ بنا رہے ہیں۔

ٹوئٹر ہینڈل چینج فار پیس نے یہ کلپ شیئر کرتے ہوئے لکھا کہ ’جس بندے نے ہمیں دلیری اور پھینٹا سکھایا اب وہ بدمعاشی سکھا رہا ہے‘۔

عثمان بٹ نے لکھا کہ ‘ کیا یہ کرکٹ کی بات ہو رہی ہے یا ریسلنگ کی؟‘

ٹوئٹر صارف  قادر خان نے پنجابی میں شعیب اختر کر مشورہ دیتےہوئے لکھا کہ ’پائین تسی یوٹیوب چلاؤ، اے بدمعاشی تواڈی اسی ویکھ لئی اے، منڈیاں نوں کرکٹ کھیڈن دیو۔۔۔ ایڈے تسی سنی دیول‘

جہاں بیشتر صارفین نے تجربہ کار سابق کھلاڑی کی جانب سے بولے گئے الفاظ کی مذمت کی وہیں اکثر ان کی بات سے اتفاق بھی کرتے نظر آئے۔ اتفاق رائے رکھنے والے صارفین میں سے ایک مبین نامی صارف  کا کہنا تھا کہ ’ابھی جتنے بھی نئے کھلاڑی کرکٹ ٹیم میں ہیں وہ سب پانچ فٹ قد کے ہیں، معذرت کے ساتھ مگر یہ حقیقت ہے فی الحال اور کوئی بھی  شاہد آفریدی کی طرح ہینڈ سم بھی نہیں ہے۔‘