بنگلہ دیش کی ’تاریخ کا بدترین ریویو‘، سوشل میڈیا پر قہقہے

 بنگلہ دیش کرکٹ ٹیم نے نیوزی لینڈ کو پہلے ٹیسٹ میچ میں آٹھ وکٹوں سے شکست دی ہے لیکن کرکٹ شائقین کے لیے بنگہ دیش کی جیت سے زیادہ دلچسپی کا حامل کپتان مومن الحق کی طرف سے لیے جانے والا ریویو ہے۔

ماؤنٹ مانگنوئی میں بنگلہ دیش اور نیوزی لینڈ کے درمیان کھیلے جانے والے پہلے ٹیسٹ میچ میں بنگلہ دیشی کے بولر تسکین احمد کی جانب سے کرائی گئی ایک گیند پر پوری ٹیم نے ایل بی ڈبلیو کی اپیل کی۔

امپائر نے راس ٹیلر کو گیند پر بیٹ لگنے کے باعث ناٹ آؤٹ دیا تو بنگلہ دیش کی جانب سے ریویو لے لیا گیا۔ 

اس ریویو کو نہ صرف سوشل میڈیا صارفین ’بنگلہ دیش کی تاریخ کا بدترین ریویو‘ قرار دے رہے ہیں بلکہ بنگلہ دیش کی جانب سے لیا گیا یہ ریویو کمنٹیٹرز کے قہقہوں کا بھی باعث بنا۔

تسکین احمد کی یہ گیند راس ٹیلر کے پیڈز سے ٹکرائی ہی نہیں بلکہ انہوں نے اس یارکر کو اپنے سیدھے بیٹ سے روکا تھا۔

کرکٹ فین نامی صارف نے بنگلہ دیش کے اس فیصلے پر طنز کرتے ہوئے کہا کہ ’اس سے فرق نہیں پڑتا کہ اور کتنے برے ریویوز لیے جاتے ہیں کیونکہ یہ والا ریویو ہمیشہ ٹاپ پر رہے گا۔‘

جہاں ایسا ریویو لینے پر بنگلہ دیش کی ٹیم کو سوشل میڈیا پر طنز کا سامنا کرنا پڑرہا ہے وہیں کچھ صارفین انہیں اچھی کرکٹ کھیلنے پر سراہ بھی رہے ہیں۔

آسٹریلین صحافی ایڈ جیکسن تبصرہ کرتے ہوئے لکھا کہ ’بنگلہ دیش نے اس ٹیسٹ میچ میں بہترین کرکٹ کھیلی ہے لیکن یہ آخرہ والا ریویو اب تک کا دیکھا گیا بدترین ریویو ہے۔‘

بھرت رام راج نامی صارف نے ریویو لینے کے اس فیصلے کو بنگلہ دیش کی جانب سے وکٹیں حاصل کرنے کی بیتابی قرار دیا۔

لیکن ’پراک سٹار‘ نامی ٹوئٹر ہینڈل نے لکھا کہ ’بنگلہ دیش نے حیران کن ٹیسٹ میچ کھیلا ہے، میں بنگلہ دیش کو اس قسم کے ریویو لینے کی اجازت دیتا ہوں۔‘

دونوں ٹیموں کے درمیان دوسرا ٹیسٹ میچ 9 جنوری سے 13 جنوری تک کرائسٹ چرچ میں کھیلا جائے گا۔