کمانڈر رائل نیوی عمان کی پاک بحریہ کے سربراہ سے ملاقات

کمانڈر رائل نیوی عمان ریئر ایڈمرل سیف بن نصیر بن محسن الراہبی نے چیف آف دی نیول سٹاف ایڈمرل محمد امجد خان نیازی سے نیول ہیڈکوارٹرز اسلام آباد میں ملاقات کی ہے۔

پاکستانی نیوی کے ڈائریکٹوریٹ جنرل پبلک ریلیشنز کی جانب سے جاری ہونے والی تفصیلات کے مطابق نیول ہیڈکوارٹرز آمد پر نیول چیف نے کمانڈر رائل نیوی عمان کا استقبال کیا۔

اس موقع پر پاک بحریہ کے دستے نے کمانڈر رائل نیوی عمان ریئر ایڈمرل سیف بن نصیر بن محسن الراہبی کو گارڈ آف آنر پیش کیا اور ان کا نیول ہیڈکوارٹرز میں پرنسپل سٹاف آفیسرز سے تعارف کرایا گیا۔

بعد ازاں کمانڈر رائل نیوی عمان نے چیف آف دی نیول اسٹاف سے ملاقات کی۔ جس میں باہمی دلچسپی کے امور، خطے کی سکیورٹی صورتحال، دو طرفہ دفاعی تعاون بشمول عسکری تربیت اور سکیورٹی کے موضوع پر تبادلہ خیال کیا گیا۔

سربراہ پاک بحریہ نے ریجنل میری ٹائم سکیورٹی پٹرولز کے ذریعے خطے میں بحری سکیورٹی اور امن کو یقینی بنانے کے لیے پاک بحریہ کے اقدامات پر روشنی ڈالی۔

ریئر ایڈمرل سیف بن نصیر بن محسن الراہبی نے خطے میں مشترکہ بحری سکیورٹی کو برقرار رکھنے میں پاک بحریہ کی کوششوں اور عزم کو سراہا۔

رائل نیوی عمان کے کمانڈر کو پاک بحریہ کی ذمہ داریوں اور استعداد کار کے حوالے سے بریفنگ بھی دی گئی۔