پاکستان کی سرکاری ویب سائٹس پر سائبر حملے
وفاقی وزیر برائے آئی ٹی امین الحق نے کہا کہ سائبر حملہ ڈیٹا سینٹر پر نہیں بلکہ نیٹ ورکنگ سائیڈ پر ہوا۔ (فوٹو: ٹوئٹر)
وزارت انفارمیشن اینڈ ٹیکنالوجی نے کہا ہے کہ حکومت پاکستان کی ویب سائٹس پر سائبر حملے ہوئے ہیں۔
پیر کو ترجمان وزارت آئی ٹی کا ایک بیان میں کہنا تھا کہ سائبر حملے سے متعلق رپورٹ تیار کی جا رہی ہے۔
دوسری جانب وفاقی وزیر برائے آئی ٹی سید امین الحق کا کہنا ہے کہ ’وزارت آئی ٹی کے ادارے این ٹی سی کے سسٹم پر سائبر حملے کی کوشش ناکام بنا دی گئی۔‘
’این ٹی سی کے سرورز پر مختلف محکموں کی ویب سائٹس ہیں۔ سائبر حملہ منگل کی صبح 11:30 بجے کیا گیا۔‘
امین الحق کا کہنا تھا کہ سائبر سکیورٹی کے جامع نظام کی وجہ سے حملے ناکام بنائے گئے۔
’سائبر حملے کی وجہ سے کچھ محکموں کی ویب سائٹس ازخود معطل ہوئیں لیکن تمام ویب سائٹس کو تین گھنٹے کے مختصر وقت میں فعال کر دیا گیا۔‘
وفاقی وزیر برائے آئی ٹی امین الحق نے مزید کہا کہ سائبر حملہ ڈیٹا سینٹر پر نہیں بلکہ نیٹ ورکنگ سائیڈ پر ہوا۔
قبل ازیں ترجمان نیشنل ٹیلی کام کارپوریشن (این ٹی سی) نے کہا تھا کہ سب میرین کیبل بینڈوتھ پر سائبر حملے ہوئے ہیں۔
ترجمان کے مطابق حملے پی ٹی سی ایل کے نیٹ ورکس پر ہوئے۔
’ڈی ڈاس اٹیک میں ڈیٹا چوری نہیں ہوا۔ فائروال کے ذریعے سائبر حملے روکنے کی کوشش کی گئی۔‘
حمزہ شہباز کے حلف اٹھانے کے بعد کابینہ کی تشکیل میں تاخیر کیوں؟Node ID: 667331
