کیا سپرمین اگلا جیمز بانڈ ہوسکتا ہے؟

برطانوی اداکار ہینری کیول نیٹ فلکس سیریز ’دا وچر‘ کے بعد اب ’سپر مین‘ کا کردار بھی نہیں نبھا پائیں گے۔

دو دن قبل ہینری کیول نے تصدیق کی تھی کہ ’یہ ایک دکھ کی خبر ہے لیکن میں بطور سپرمین سکرین پر واپس نہیں آؤں گا۔‘ برطانوی اداکار کے اس اعلان کے بعد سوشل میڈیا پر ان کے پرستاروں کی طرف سے یہ قیاس آرائیاں کی جا رہی ہیں کہ شاید ہینری کیول ’جیمز بانڈ‘ میں ایجنٹ 007 کا کردار نبھائیں گے۔

خیال رہے ’جیمز بانڈ‘ سیریز کی فلم ’نو ٹائم ٹو ڈائی‘ برطانوی اداکار ڈینیل کریگ کی بطور ایجنٹ 007 آخری فلم تھی۔

ہینری کیول کے ’سپر مین‘ سے ڈراپ ہونے پر امریکی ہدایتکار اور اداکار سٹیفن فورڈ نے ایک ٹویٹ میں لکھا ’تو اس کا مطلب یہ ہے کہ بالآخر ہینری کیول جیمز بانڈ کا کردار نبھائیں گے؟‘

جوزف سکرمشا نے مشورہ دیا کہ ’ذاتی طور پر میں سمجھتا ہوں فلم فرینچائزوں کو ایک دوسرے سے اداکار تبدیل کرلینے چاہییں۔ ہینری کیول جیمز بانڈ ہوں اور ڈینیل کریگ سپرمین۔‘

ایڈم رولینڈ نے ایک ٹویٹ میں ’جیمز بانڈ‘ کے فلماسازوں کو مشورہ دیا کہ ’انہیں درست کام کرنے کی اور ہنری کیول کو نیا جیمز بانڈ بنانے کی ضرورت ہے۔‘

خیال رہے برطانوی اداکار نیٹ فلکس کی سیریز ’دا وچر‘ کے تین سیزنز میں جلوہ گر ہو چکے ہیں لیکن چوتھے سیزن میں ان کی جگہ آسٹریلوی اداکار لیام ہیمزورتھ ایکشن میں نظر آئیں گے۔

اس سے قبل بین الاقوامی میڈیا اور شوبز پنڈتو کی جانب سے اگلے ’ایجنٹ 007‘ کے کردار کے لیے ٹام ہارڈی، ادریس ایلبا، ٹام ہالینڈ اور سیلین مرفی سمیت متعدد اداکاروں کے نام بھی لیے جاتے رہے ہیں۔