’وہاب ریاض واحد وزیرِ کھیل ہوں گے جو پی ایس ایل کھیلیں گے‘

پاکستان کے صوبہ پنجاب کی نگران حکومت کی کابینہ میں فاسٹ بولر وہاب ریاض بھی شامل ہیں۔
وہاب ریاض نگران حکومت میں بطور صوبائی وزیر کھیل اپنے عہدے کا حلف اٹھائیں گے۔

گورنر پنجاب بلیغ الرحمان کی جانب سے جب نگران کابینہ کا حلف لیا گیا تو اس میں وہاب ریاض شامل نہیں تھے۔
وہاب ریاض بنگلہ دیش میں ٹی20 لیگ بنگلہ دیش پریمیئر لیگ (بی پی ایل) کھیلنے میں مصروف ہیں۔ وہ وطن واپس آ کر اپنے عہدے کا حلف لیں گے۔
وہاب ریاض کی بطور صوبائی وزیر تعیناتی کو دلچسپ انداز میں دیکھا جا رہا ہے کیونکہ وہ نہ تو ابھی قومی کرکٹ ٹیم سے ریٹائر ہوئے ہیں بلکہ وہ 13 فروری سے شروع ہونے والی پاکستان سپر لیگ (پی ایس ایل) میں بھی پشاور زلمی کی جانب سے ایکشن میں نظر آئیں گے۔
اسی سلسلے میں سماجی رابطوں کی ویب سائٹ ٹوئٹر پر بھی صارفین کے دلچسپ تبصرے دیکھنے میں آ رہے ہیں۔
احتشام الحق نے اپنی ٹویٹ میں لکھا کہ ’وہاب ریاض واحد وزیرِ کھیل ہوں گے جو پی ایس ایل بھی کھیلیں گے۔‘

ساتھی کھلاڑی اعظم خان نے بنگلہ دیش میں موجود وہاب ریاض کی تصویر ٹوئٹر پر شیئر کرتے ہوئے کہا کہ ’پنجاب کے وزیرِ کھیل کے ساتھ چِل کر رہا ہوں۔‘

سید محمد شہزاد نے نگران صوبائی کابینہ کے نوٹیفیکیشن کی تصویر اپلوڈ کی اور لکھا کہ ’وہاب ریاض کا بیٹنگ آرڈر وہی رکھا ہے جو پاکستانی ٹیم میں تھا۔‘

اچھا رو مت طوبی نامی ایک ہینڈل نے 2001 میں بالی وُڈ کی فلم ’نایک دی رئیل ہیرو‘ کا کلپ شیئر کیا جس میں انیل کپور ایک دن کے لیے وزیر اعلی بنتے ہیں۔ انہوں نے لکھا کہ ’وہاب ریاض بطور وزیر کھیل۔‘

مینگو جام لکھتے ہیں کہ ’وہاب ریاض کو بھی وزیر بنا دیا ہے جس نے اگلے دو مہینے پی ایس ایل میں  مصروف رہنا ہے۔‘

واضح رہے کہ نگران حکومت صوبے میں انتخابات ہونے تک اپنی ذمہ داریاں نبھائے گی۔