سعودی عرب کے خارجہ امور کے نائب وزیر وليد عبدالكريم الخريجي نے وفد کے ہمراہ پاکستان کی وزیر مملکت برائے امور خارجہ حنا ربانی کھر کے ساتھ ملاقات کی۔
منگل کو پاکستان کی وزارت خارجہ کی جانب سے جاری ہونے والی پریس ریلیز کے مطابق ملاقات میں توانائی، زراعت، آئی ٹی اور کان کنی کے شعبوں میں سعودی سرمایہ کاری کے لیے باہمی تعلقات کو مضبوط بنانے پر گفتگو ہوئی۔
بیان میں کہا گیا کہ نائب وزیر وليد عبدالكريم الخريجي کے وفد میں سعودی وزارت خارجہ، توانائی، صحت، ماحولیات، زراعت اور سرمایہ کاری سمیت مختلف وزارتوں کے ممبران شامل تھے۔
وزیر مملکت برائے امور خارجہ حنا ربانی کھر نے سعودی عرب کی طرف سے پاکستان میں سرمایہ کاری میں دلچسپی ظاہر کرنے کا خیرمقدم کیا۔
پریس ریلیز میں مزید کہا گیا کہ انہوں نے سعودی وفد کو سپیشل انویسٹمنٹ فیسیلیٹیشن کونسل (ایس آئی ایف سی) کی تشکیل کے بارے میں بریفنگ دی جس کا مقصد جی سی سی ممالک اور خصوصاً سعودی عرب کی ممکنہ سرمایہ کاری کے عمل کو تیز بنانا ہے۔
ملاقات میں باہمی دلچسپی کے عالمی اور علاقائی معاملات پر بھی گفتگو کی گئی۔
