کیپ ٹاؤن ٹیسٹ: انڈین بیٹنگ لائن بھی خزاں کے پتوں کی طرح بکھر گئی

جنوبی افریقہ اور انڈیا کے درمیان دو ٹیسٹ میچوں پر مشتمل سیریز کے دوسرے میچ کے پہلے دن تیسرے سیشن میں ہی دو اننگز ختم ہو گئیں۔

بدھ کو کیپ ٹاؤن میں کھیلے جا رہے میچ میں انڈیا کی پوری ٹیم اپنی پہلی اننگز میں 153 رنز پر ڈھیر ہوگئی جس پر اسے جنوبی افریقہ پر 98 رنز کی برتری حاصل ہے۔

انڈیا کی طرف سے پہلی اننگز میں وراٹ کوہلی 46 رنز بنا کر نمایاں رہے جبکہ کپتان روہت شرما نے 39 اور شبھمن گِل نے 36 رنز بنائے۔

جنوبی افریقہ کی جانب سے کاگیسو رباڈا، لُنگی نگیڑی اور ناندرے برگر نے تین تین کھلاڑیوں کو آؤٹ کیا۔

پہلی اننگز میں انڈیا کے چھ بیٹرز صفر کے سکور پر آؤٹ ہوگئے۔

 پہلی اننگز میں صفر پر آؤٹ ہونے والے انڈین بیٹرز میں یاشسوی جیسوال، شریاس ایئر، رویندرا جڈیجہ، جسپریت بمراہ، محمد سراج اور پراسدھ کرشنا شامل ہیں۔
 

اس سے قبل پہلی اننگز میں جنوبی افریقہ کی پوری  ٹیم پہلی اننگز میں صرف 55 رنز پر ڈھیر ہوگئی۔

جنوبی افریقہ نے ٹاس جیت کر پہلے بیٹنگ کا فیصلہ کیا جس کے بعد کھانے کے وقفے سے پہلے پوری جنوبی افریقی ٹیم صرف 23.2 اوورز میں 55 رنز بنا کر آؤٹ ہوگئی۔

جنوبی افریقہ کی جانب سے کائل ویرینے نے 15، ڈیوڈ بیڈنگھم نے 12 اور کاگیسو رباڈا نے 5 رنز بنائے۔

انڈیا کی جانب سے محمد سراج نے تباہ کن بولنگ کرتے ہوئے صرف 9 اوورز میں 15 رنز دے کر 6 وکٹیں حاصل کیں۔

محمد سراج کے علاوہ جسپریت بمراہ اور مکیش کمار نے دو، دو کھلاڑیوں کو آؤٹ کیا۔
 

یہ ٹیسٹ کرکٹ کی تاریخ میں کسی بھی ٹیم کا انڈیا کے خلاف سب سے کم ٹوٹل ہے جبکہ محمد سراج نے بھی اپنے ٹیسٹ کیریئر کی سب سے عمدہ پرفارمنس دی ہے۔

خیال رہے اس سے قبل سینچورین میں کھیلے گئے پہلے ٹیسٹ میں جنوبی افریقہ نے انڈیا کو ایک اننگز اور 32 رنز سے شکست دے کر سیریز میں 0-1 کی برتری حاصل کر لی تھی۔