ابوظبی میں اماراتی صدر سے جنرل عاصم منیر کی ملاقات، دفاعی امور پر تبادلہ خیال

متحدہ عرب امارات کے صدر شیخ محمد بن زاید آل نہیان نے سنیچر کو قصرالشاطی میں  پاکستان کے آرمی چیف جنرل عاصم منیر کا خیرمقدم کیا۔

سرکاری خبر رساں ایجنسی ’وام‘ کے مطابق پاکستان کے آرمی چیف جنرل عاصم منیر نے امارات کے صدر سے شیخہ مریم بنت عبداللہ بن سلیم الفلاسی کے انتقال پر اظہار تعزیت کیا۔

ملاقات میں اماراتی صدر اور پاکستان کے آرمی چیف نے دوطرفہ تعلقات، دفاعی امور اور ایشوز پر تبادلہ خیال کیا گیا۔

متحدہ عرب امارات اور پاکستان کے درمیان تعاون کی سطح، جوائنٹ ورک اور مشترکہ مفادات کی تکمیل کے لیے ان کی سپورٹ اور ترقی کے طریقوں پر بھی بات چیت کی گئی۔

اس موقع پر متحدہ عرب امارات کے کئی اعلٰی عہدیدار بھی موجود تھے۔

سنیچر کو اماراتی سفارت خانے کی ٹویٹ کے مطابق ’محمد بن زاید آل نہیان نے جنرل عاصم منیر كا ابوظبی میں استقبال کیا۔‘

بیان کے مطابق ملاقات میں علاقائی صورت حال اور دونوں ملكوں كے درمیان دوطرفہ تعاون وشراكت داری كو بڑھانے كے طریقوں پر تبادلہ خیال كیا گیا۔ 

یاد رہے کہ آرمی چیف بننے کے بعد جنرل عاصم منیر نے اپنا پہلا غیر ملکی دورہ سعودی عرب اور متحدہ عرب امارات کا کیا تھا۔

جنوری میں امارات کے صدر اور آرمی چیف کی ملاقات کے دوران دفاعی و عسکری امور میں پاکستان اور امارات کے درمیان تعاون کے تعلقات، مل کر کام کرنے کے ساتھ دونوں دوست ملکوں کے مشترکہ مفادات کے لیے انہیں مضبوط بنانے کے طریقوں کا جائزہ لیا گیا تھا۔ 

اس سے قبل سعودی ولی عہد شہزادہ محمد بن سلمان نے اتوار کو العلا کے سرمائی کیمپ میں پاکستان کے آرمی چیف جنرل عاصم منیر کا خیر مقدم کیا تھا۔
 ایس پی اے کے مطابق ملاقات میں دوطرفہ تعلقات اور انہیں ترقی دینے کے مواقع کا جائزہ لیا گیا۔ اور مشترکہ تشویش کے امور پر بھی تبادلہ خیال کیا گیا۔