دبئی کی سڑک سے رُکاوٹیں ہٹانے والا پاکستانی ڈیلیوری بوائے کیسے مشہور ہوا؟

جب پاکستانی ڈیلیوری بوائے وقاص سرور نے متحدہ عرب امارات کی ریاست دبئی کی ایک مصروف شاہراہ پر ایک بیریئر پڑا ہوا دیکھا تو اپنی موٹرسائیکل روکی اور اُس بیریئر کو ہٹا کر سائیڈ پر رکھ دیا۔

انہیں معلوم ہی نہیں تھا کہ ان کا یہ عمل کیمرے کی آنکھ نے محفوظ کر لیا ہے اور ان کی یہ ویڈیو سوشل میڈیا پر وائرل ہوجائے گی۔

ان کے اس عمل پر انہیں شاباشی متحدہ عرب امارات کی وزارت برائے ہیومن ریسورسز اور اماراتائزیشن نے دی اور ویڈیو بھی ٹوئٹر (ایکس) پر شیئر کی۔

وقاص سرور ’ڈیلیورو‘ کمپنی کے رائیڈر ہیں۔ ان کے حوالے سے اماراتی وزارت نے ایک ٹویٹ میں لکھا کہ ’ہم وقاص سرور کی وہ ویڈیو دیکھ چکے ہیں جس میں وہ دیگر ڈرائیورز کی حفاظت کو یقینی بنانے کے لیے سڑک سے بیریئر ہٹاتے ہوئے نظر آرہے ہیں اور انڈر سیکریٹری برائے ہیومن ریسورسز افیئرز خیلیل الخوری نے انہیں خوش آمدید کہا، اعزاز بخشا اور ایک اچھا عمل کرنے پر شکریہ ادا کیا۔‘

وائرل ہونے والی ویڈیو میں وقاص سرور کو دبئی کی ایک مصروف شاہراہ سے ایک سفید رنگ کا بیریئر سڑک سے ہٹاتے ہوئے دیکھا جا سکتا ہے جو تیز ہوا کے باعث بیچ سڑک پر آگرا تھا۔

خلیچ ٹائمز کے مطابق وقاص سرور نے اماراتی وزارت کے حکام سے گفتگو میں کہا کہ انہیں معلوم ہی نہیں تھا کہ ان کے اس عمل کی کہیں ویڈیو بھی بن رہی ہے۔

ان کا کہنا تھا کہ ’میں نے بس وہ کیا جو مجھے صحیح لگا۔ جب میں چورنگی سے دائیں ہاتھ پر مُڑا تو میں نے وہاں رُکاوٹ دیکھی اور اپنی موٹرسائیکل روک دی۔ میں نے موٹرسائیکل سائیڈ پر کھڑی کی اور سڑک کو کلیئر کر دیا۔‘

پاکستانی رائیڈر کے مطابق ان کا مقصد صرف حادثات کے خدشے کو کم کرنا تھا۔ ’پہلے میں نے خود کو بچایا، لیکن کیا معلوم میرے پیچھے کوئی ایسا موٹر سائیکل سوار بھی آرہا ہوتا جسے یہ بیریئر نظر نہیں آتا اور وہ کسی حادثے کا شکار ہو جاتا۔‘

انہوں نے کہا کہ ’ہم انسان ہیں اور مسلمان بھی ہیں۔ ہمیں دوسرے افراد کا بھی ہمیشہ خیال رکھنا چاہیے۔‘

وقاص سرور گذشتہ 12 برسوں سے متحدہ عرب امارات میں مقیم ہیں۔ ان کا کہنا ہے کہ انہیں اپنی ویڈیو وائرل ہونے کے حوالے سے اس وقت معلوم ہوا جب ایک شخص ان کے پاس آیا اور کہا کہ ’یہ ویڈیو میں آپ ہیں۔‘

ان کے مطابق ’میں نے تو اپنا ہیلمٹ بھی نہیں اُتارا تھا لیکن وہ شخص میرا حلیہ پہچانتا تھا۔ اس وقت مجھے پتا چلا کہ یہ ویڈیو وائرل ہوگئی ہے۔‘

اپنے اچھے عمل پر تعریفیں اور تحائف کا حقدار قرار پانے والے وقاص سرور کا کہنا ہے کہ ’ان کے لیے عزت ملنا سب سے زیادہ اہم ہے۔‘

انہوں نے مزید کہا کہ ’ایک اعلیٰ عہدے دار نے مجھ سے رابطہ کیا، مجھ سے شفقت سے بات کی اور ایک تحفہ بھی دیا۔ میں بہت خوش ہوں۔ تحفہ اہم نہیں ہے بلکہ اہم وہ عزت ہے جو لوگ مجھے دے رہے ہیں۔‘