یکم جنوری سے کون سے سمارٹ فونز پر واٹس ایپ کام نہیں کرے گا؟

واٹس ایپ پیغام رسانی اور رابطہ کرنے کے لیے استعمال کی جانے والی دنیا کی سب سے مقبول ایپ ہے۔

واٹس ایپ کے ذریعے جہاں صارفین میسجز سمیت ویڈیو اور آڈیو کالز کرتے ہیں وہیں یہ ایپلی کیشن اب سوشل میڈیا پلیٹ فارم کا رُوپ بھی دھار چکی ہے۔

ویب سائٹ سیول ڈاٹ کام کے مطابق جیسے جیسے واٹس ایپ جدت کی جانب جا رہی ہے اور اس میں موجود فیچرز جدید ہوتے جا رہے ہیں ویسے ہی یہ ایپ پرانے سمارٹ فونز پر مزید نہیں چل سکے گی۔

میٹا کی جانب سے یکم جنوری 2025 سے واٹس ایپ کو ایسے سمارٹ فونز پر بند کیا جا رہا ہے جن میں اینڈرائڈ آپریٹنگ سسٹم پرانا ہے۔

واٹس ایپ کی جانب سے اب صارفین کو ایچ ڈی کوالٹی میڈیا شیئرنگ، ڈاکومنٹ شیئرنگ اور آرٹیفیشل انٹیلیجنس جیسے اہم فیچرز دیے جا رہے ہیں تو یہ ایپ اب اینڈرائڈ کِٹ کیٹ (اینڈرائڈ 4.4) یا اس سے پرانے آپریٹنگ سسٹم پر مزید نہیں چلے گی۔

یکم جنوری سے جو موبائل واٹس ایپ نہیں چلا سکیں گے اُن میں سام سنگ گیلکسی ایس تھری، سام سنگ گیلکسی نوٹ ٹو، گیلکسی ایس تھری اور گیلکسی ایس فور مِنی شامل ہیں۔

اسی طرح موٹورولا میں یہ ایپ موٹو جی (فرسٹ جین)، موٹورولا ریزر ایچ ڈی اور موٹو ای میں نہیں چلے گی۔

یکم جنوری سے واٹس ایپ ایچ ٹی سی کے جن فونز میں نہیں چلے گی اُن میں ون ایکس، ون ایکس پلس، ڈیزائر 500، ڈیزائر 601، آپٹیمس جی اور نیکسس 4 شامل ہیں۔

واٹس ایپ ایل جی کے جی ٹو مِنی اور ایل 90 میں بھی نہیں چلے گی جبکہ سونی ایکسپیریا زیڈ، ایکسپیریا ایس پی، ایکسپیریا ٹی اور ایکسپیریا وی میں بھی واٹس ایپ کا سفر یکم جنوری سے اختتام پذیر ہو جائے گا۔